|
اتحاد الشباب التقدمي
حزب التجمع بالمحلة الكبرى
|
|
مش هانضرب .. مواطنون لا رعايا
إهانة المواطن داخل أقسام الشرطة أصبحت جزءا لا يتجزأ من سياسة تجويع و إفقار و إذلال الشعب المصري, فضابط الشرطة الآن في مصر أصبح ضابطا أسطوريا, يعتقد أنه القوة عند الله في السماء, و يملكها هو وحده في الأرض, و هكذا أصبحنا كلنا في عيون ضباط الشرطة قطيع من الحيوانات, يهينوننا و يضربوننا و يعذبوننا كيفما شاءوا, و الآن و بعد الضغوط الشعبية على النظام بعدد فضيحة كليبات التعذيب التي كان أحد أبطالها الضابط إسلام نبيه الذي تم تحويله للتحقيق حاليا و وقفه عن العمل, تعالوا سويا نعلن للجميع رفضنا لهذا الأسلوب الذي يتبعه ضباط الشرطة, و نبدأ حملة "مش هانضرب .. مواطنون لا رعايا", لنعلن فيها لكل هؤلاء الضباط الذين ينتهكون كرامتنا و يتعدون علينا بالضرب و التعذيب أننا سنواجههم, و سنرفض الإهانة.
يعني إيه ضابط شرطة ؟
ضابط الشرطة هو موظف عادي, زيه زي موظف البريد, الفرق بينهم إن موظف البريد مهمته إنه يوصل للناس جواباتها, و ضابط الشرطة مهمته إنه يحافظ على الناس و يحميها.
طب إيه اللي بيحصل ؟
اللي بيحصل إن معظم ضباط الشرطة مفكرين نفسهم فوق الجميع و فوق القانون, و ده لأسباب كتير منها المعاملة اللي كانوا بيعاملوهم بيها في كلية الشرطة, فنلاقي الضابط ماشي يلطش و يشتم في الكل حتى الناس اللي سنها أكبر من سن أبوه, و كمان إحنا غلطانين لأن مثلنا الشعبي بيقول "يا فرعون إيه فرعنك قال ملقتش حد يلمني", يعني إحنا كمان بنسكت لما أي ضابط أو مخبر أو عسكري يمد إيده علينا, أو يشتمنا بألفاظ قذرة, سواء كان جوا القسم أو في الشارع.
طب اللي الضابط بيعمله قانوني ؟
لا طبعا, كل الممارسات اللي الضباط بيعملوها دي غير قانونية, لأن الدستور بيقول إن المواطنين أمام القانون سواء, و القانون بيقول إن الشرطة في خدمة الشعب, و بالتالي كل الممارسات دي ممكن يتحاكموا عليها, بس المفروض إننا إحنا ناخد موقف, على الأقل علشان كرامتنا, ما هو أصل يعني مينفعش إن ضابط الشرطة يكون هو الوحيد اللي عنده كرامه في البلد, و بقية الناس ممكن مخبر يضربهم و يشتمهم و يمسح بكرامتهم الأرض.
طب المفروض نعمل إيه ؟
المفروض أول حاجة إننا منخافش, مبقاش في حاجة نخاف عليها, أخدوا مننا كل حاجة, التعليم بقى بفلوس, و المستشفيات العامة إنتم أدرى بوضعها, و المرتبات مبقتش تكفي نص الشهر, و الأسعار بقت خيالية, و الشباب بالملايين مش لاقيين شغل, مبقاش فاضل لينا إلا كرامتنا و إنسانيتنا, يبقى على الأقل نحافظ عليهم, و نقول مش هنضرب, هنرفض الضرب لأننا بني آدمين مش حيوانات, و لأن اللي بيضربنا ده واحد زينا, إن لم يكن أقل علميا و أخلاقيا من ناس كتير قوي.
المفروض على كل واحد إتهانت كرامته إنه يلجأ للنيابة, يشتكي الضابط و ميخافش, و في محامين كتير مستعدة للتطوع و بالمجان لمساعدتنا علشان ناخد حقوقنا, و لو خايف إتصل بينا, هيطلع معاك مجموعة من المحامين, يروحوا يشتكوا و يجيبولك حقك, من غير و لا مليم, بس عشان نحس إننا بني آدمين, مش هما بس البني آدمين و بقية الناس حيوانات.
|
اتحاد الشباب التقدمي بالمحلة الكبرى
|
لجنة الحريات بحزب التجمع بالمحلة
|
|
|
0123535994 – 2100761 - 2123055
|
